LEGAZPI CITY — Direktang ipighayag kan sarong lehislador na pighihidale suboot an pag-oktaba kan barangay asin Sangguniang Kabataan elections sa House Committee on Suffrage and Electoral Reforms.
Sa intrevista kan Bombo Radyo Legazpi ki ACT Teachers Partylist Representative Antonio Tinio, klarado suboot na ratsada an ipigsasagibong proseso sa nasabing propuesto kun saen dae pigpensar na tulos na maaprubaran sa sarong pagdangog pa sana kan komiteba.
Segun pa ki Tinio, bako man suboot malabong mangyari na maparikas an proseso kaini hasta third reading na kayang-kayang maipasar kan Kamara antes an lenten break.
Mientras tanto, importanteng dapat tutukan suboot, segun ki Tinio, an magiging lakdang man kan Senado urog na wara pang counterpart an propuesto sa halangkaw na sanga kan Kongreso.
Naglalaom man an nasabing lehislador na mapalyar an propuesto pag-abot sa Senado huli ta dakol naman suboot na senador an nagpahayag nin pagkontra digdi.
Magigirumduman na enot naman na nagkainitan asin nagkasimbagan an nagkapirang lehislador kaibanan na si Tinio kun saen direktang sinabi kaini na pansadiring interes an nasa likod kan ipigbubusol na propuesto mantang makapal an pandok kan mga opisyal na nagmamawot pang mapahalaba an termino kan pagsi-servicio.
