LEGAZPI CITY – Liwat na nagpatanid an Philippine Postal Corporation sa mga kliyente asin customer na magin maingat sa mga transaksyon asin pagtubod sa mga nareresibeng mensahe sa email man o sa texts.
Mismong an central office kaya kan PhlPost an nagbaba nin abiso sa publiko na mag-ingat sa mga email scams.
Segun ki Neneth Baylon, PhlPost Legazpi postmaster sa intrevista kan Bombo Radyo Legazpi, kan nakalihis na taon pa namonitor an mga siring kaining reklamo na naglakop bako sana sa sarong partikular na lugar kundi magin sa iba pang area.
May nagkapirang customer man an nagpasiring sa oficina ngani na mag-inquire dapit sa binayadang parcel suboot sa bangko alagad sa pagtrace kan oficina, bako man palan totoo.
En caso makaresibe nin siring na email, dapat na maimpormaran an publiko na kun international o domestic man hali an parcel, dapat nagpupuon sa duwang letter an tracking number asin may siyam na numero mantang sa duwang letra giraray matapos.
Dugang pang abiso na dai man nag-aako nin bayad na diretso sa bangko an PhlPost sa buwis kan parcel alagad nag-iisyu nin money order check na ipigsusumiter man sa Bureau of Customs.
Mientras tanto, kun mabiktima, magdulok tulos suboot sa pulisya na nakakasakop sa cybercrime ngani na mapanimbag an may kagibo kan modus. (with reports from Bombo Riza Rian)
