LEGAZPI CITY- Pig-iinganyar kan Philippine Military Academy (PMA) an bikolanos na mag take nin PMA entrance examination na gigibuhon ngunian na Agosto 24 sagkod 25 sa presenteng taon.
Isasagibo an nasabing eksaminasyon sa Naval Forces Southern Luzon sa Regional Site Rawis Legazpi City.
Segun kay Major Jenny Rose Galit an OIC Professor kan Philippine Military Academy sa naging intrevista kan Bombo Radyo Legazpi na nag-aakseptar man sinda nin mga walk-in applicants puon alas 6 nin aga sagkod alas 8 nin pagka aga kun saen dae nakalaog sa saindang online registration.
Sa ngunian, maabot na sa 398 an naresibi nindang online application sa Legazpi asin pinaglalaoman na maabot sa 1,000 applicants an saindang isasagibong duwang aldaw na application period sa syudad.
Mientrastanto, sinabi man kan opisyal an mga kwalipikasyon na kinakaipuhan kan sarong aplikante.
Kaipuhan suboot na natural-born Filipino citizen na may edad 17 sagkod 22 anyos, senior high school graduate, may langkaw na 5ft asin dae malagpas sa 6 ft and 4 inches.
Kinakaipuhan man na igwang good moral character, daeng agom asin dae pa nagkakaaki asin warang ano man na kaso may kinaaraman sa administratibo o kriminal.
Pig-abisohan man kan opisyal an mga aplikante na magdara nin photocopy kan saindang PSA birth certificate, Form 137 o Form 138, 2×2 ID photo, asin valid ID.
