LEGAZPI CITY — Nagpapadagos ngunyan an mahigot na pagbabantay kan Puersa Armadas kan Pilipinas sa probinsya kan Sorsogon urog na sa mga liblib na banwaan katakod kan padagos na nairerehistro na iligal na mga paghiro kan mga rebeldeng New People’s Army (NPA).
Sa intrevista kan Bombo Radyo Legazpi ki Brig. General Fernando Trinidad, commanding officer kan 903rd Infantry Brigade, ipigsugo suboot niya sa saiyang mga nasasakupan na mas pahiguton pa an pagbabantay sa mga sibilyan sa nasambitan na probinsya huli sa padagos na pangha-harass kan mga rebelde.
Segun sa opisyal, kun kinakaipuhan na sundan, talagang susundan an mga ini huli ta maabot an panahon na mapapagala man sana an mga NPA sa saindang pagdulag asin pakikipaglaban sa gobyerno.
Segun ki Trinidad, pigtatawan ninda nin focus ngunyan an mga banwaan kan Gubat asin Magallanes huli sa nakakaabot saindang impormasyon na igwang namamataan na mga armadong kalalakihan.
Marurumduman na nagkaigwa nin engkwentro sa Brgy. Pili, Magallanes kan nakalihis na Domingo mantang nagpapatrolya an mga suldados sa lugar.
Mientrastanto, segun ki Trinidad, kun habo nin peace talks kan mga rebeldeng NPA, wara sindang magiginibo kundi labanan an mga ini ngani na matapos na an paghahatod nin kariribukan asin takot sa publiko.
