Ligtas an mga Pilipino sa Qatar, sa ibong kan pagkaimbwelto kan nasyon sa nagtitinding giyera sa Middle East.
Sa ekslusibong intrevista kan Bombo Radyo ki Philippine Ambassador sa Qatar Amb. Mardomel Celo Melicor, pigsierto kaini na maray an kamugtakan kan mga obrerong Pilipino duman, asin pig-aasikaso man kan gobyerno kan Qatar an saindang karahayan.
Limang aldaw na suboot na dae nakaeksperyensya nin missile attack an naunambitang nasyon, mantang padagos man liwat an regular na trabaho kan mga obrerong Pilipino.
Sa ibong kan dai pa masierto kun gano kahaloy an giyera, naglalaom an opisyal na mabalik na sa normal an sitwasyon sa nasyon, urog nang epektibo man an defense system kan Qatar sa pagharang kan mga missiles na piglansar kan Iran.
Epektibo man an real-time alarm na nareresibe kan mga obrerong Pilipino hale sa gobyerno kan Qatar sa kada may ilulunsar na missile na posibleng tamaan an nasyon.
Sa presente, wara nang nairido o nalugadan na mga Pilipino afuera sa sarong aking lalaki kan sarong Overseas Filipino Worker (OFW) na nalugadan kan enot na mga aldaw kan ma-imbuelto an Qatar sa mahiwas na giyera.
Ipinaliwanag ni Amb. Melicor na nagsapo sana nin gasgas an Pinoy makalihis na mahulog an mga debris sa sarong istraktura kun saen presenteng nagagamit siya nin computer.
Tulos man na pinaluwas an Pinoy makalihis na magresibi nin first aid.
