LEGAZPI CITY – Inako kan pamayuhan kan Philippine Drug Enforcement Agency (PDEA) Bicol na madidifisilan sinda asin an PNP sa pag-iimbestigar sa pinaghalian kan P125 milyong kantidad nin cocaine na narekober sa baybayon na sakop kan Matnog, Sorsogon.
Sa intrevista kan Bombo Radyo Legazpi ki PDEA Bicol Director Christian Frivaldo, paramientras na man na ipinapundo an search and recovery operation sa posibleng iba pang kontrabando sa kadagatang sakop kan Sorsogon asin Samar makalihis an tulong aldaw na operasyon.
Segun didgi, nakikipagkoordinar na man sinda sa Taiwan makalihis ihayag kan Taipei Economic and Cultural Office in the Philippines (TECO) na wara sa database ninda an M/V Jin-Ming Nr. 16 na suminadsad sa Northern Samar.
Pigduon kan nasambitan na opisyal na wara sindang intensyon na maraot an relasyon kan TECO asin Pilipinas huli ta nakabase sana suboot sinda sa mga nakukua nindnag impormasyon.
Marurumduman an enot nang nagluwas an bareta na dakula an pagtubod kan mga otoridad na posibleng hali sa nasambitan na cargo vessel an narekober na 25 pakete nin cocaine.
Dae man suboot pighahali an posibilidad na biktima man an nasambitan na nasyon sa pamemeke nin dokumento kan mga crew kun sain na-divert na an atensyon kan mga otoridad huli sa panibagong isyu.
Dugang pa ni Frivaldo na pigpapasakamot na kan PDEA sa Bureau of Immigration an pag-iimbestigar sa siyam na crew na lunad kan nasambitan na barko kasabay kan pahayag na magpapadagos an saindang mas hirarom na imbestigasyon.
