Inihayag ni Presidente Ferdinand Marcos Jr. na an pagbisita niya sa Naga City an bako para sa pulitika kundi parte kan serbisyo publiko.
Ini sa tahaw kan mga espekulasyon na pigkokonsidera si Naga Mayor asin dating vice president Leni Robredo na magdalagan bilang presidente sa 2028 national elections.
Kan hinapot si Marcos dapit sa nasabing isyu, sinabi kaini na dae ninda ini pinag-olayan ni Robredo huli ta an kaipuhan enoton iyo an serbisyo asin bako an pulitika.
Kasabay kaini, sinabi ni Marcos na an pinaka-pulitika na ginibo niya iyo an pagsulot nin pink na medyas bilang pagbisto ki Robredo.
Ini an sarong pagtukoy sa kulay pink na ginamit ni Robredo sa saiyang kampanya kan nagdalagan siya bilang presidente kan 2002 kun sain nadaog siya ki Marcos.
Sinabi ni Marcos na pirang bulan na nindang pigpaplano an “Oplan Kontra Baha” na pinunan sa Naga City huli sa kritikal na lokasyon asin dakulang volume kan tubig sa rehiyon.
Tinawang-duon ni Marcos na an saindang katuyuhan iyo na mahanapan nin solusyon an pagbaha bako sana sa Naga City kundi sa bilog na Camarines Sur asin sa bilog na Bicol Region.
Katuyuhan kan pagbisita na personal na inspeksyunon an mga lakdang kan lokal na gobyerno sa flood control asin masyerto an tamang implementasyon kan mga flood control projects sa ciudad.
An naunambitang aktibidad an parte kan padagos na koordinasyon kan gobyerno nasyonal asin lokal para mas mapakusog an disaster preparedness asin maprotehiran an mga komunidad sa Naga laban sa epekto kan makusog na pag-uran.
