LEGAZPI CITY – Direktang kinontra ni Public Attorneys Office (PAO) chief Atty. Persida Acosta an rekomendasyon na liwat ibalik an paggamit kan Dengvaxia dengue vaccine.
Magigirumduman na inengganyar ni dating Health Secretary asin presenteng Iloilo 1st District Representative Janette Garin an Department of Health (DOH) na magkaigwa nin political will asin idagos an vaccination drive sa tahaw kan naglalanglaw na dengue cases sa nasyon.
Sa ekslusibong intrevista kan Bombo Radyo Legazpi ki PAO Chief Acosta, parte suboot ini kan taktika ni Garin tangarig depensaran an sadiri sa mga kinakahampang na kaso.
Segun ki Acosta, warang kasiertuhan na magigin epektibo ini urog na mismong an mga eksperto kan manufacturer na Sanofi Pasteur an nagsabi na kakabit kan vaccine an apat na nakakagadan na side effects puon sa anaphylactic allergic reaction, organ asin brain bleeding siring man an dugang na huma sa paglala kan dengue.
Pinahimutikan man kaining mawot sana kan PAO na magcrear nin takot kasabay kan agyat ki Garin na punan muna kaini an pagbakuna sa sadiring angkan.
Mientras tanto, nag-abot na sa 44 na kaso an ipigsunad kan PAO kontra sa mga nagbusol kan dengue vaccine, na nagrerepresentar sa pamilya kan mga nagadanan huli suboot digdi.
