LEGAZPI CITY-Ipigsunad giraray ni Speaker Ferdinand Martin Romualdez an panukalang ley na obhetong matawanan nin hazard pay kada bulan an mga prosecutors.
An House Bill (HB) No. 2664 nakatalagang magtao nin P5,000 na hazard pay sa mga tagausig na nagkakapot nin peligrosong mga kaso siirng kan mga paglilitis sa inquest, pangenot na imbestigasyon asin an mga paguusig na igwang kinaaraman sa terorismo, iligal na droga, pandarambong asin an kurapsyon, laundering kan mga kwarta asin iba pang delikadong kriminal na pagbayolar.
Kairiba sa mga co-authors kan nasambitang panukala sinda Tingog Party-list Representatives Yedda Marie K. Romualdez, Andrew Julian K. Romualdez asin Jude Acidre.
Ipinunto man kan mga mambabatas na an mga prosecutors an pirmihang target kan mga igwang maraot na intensiyon.
Sakop kan panukala an mga prosecutors hale sa Department of Justice’s (DOJ) National Prosecution Service na nagkakapot nin mga high-risk cases, kairiba na an mga imbuelto sa national security, transnational crimes asin environmental offenses.
Sakop man an mga prosecutors na naka assign sa conflict areas, calamity areas, asin mga isolated assignment.
Malinaw man sa nasambitang panukala na tax-exempt an ipigsusunad na hazard pay.
Kukuwaon man an pondo kaini sa DOJ asin itatalaga an taunang budget hale sa General Appropriations Act (GAA).
Kumpiyansa si Romualdez na an nasabing panukala, iyo an magsusuporta kan mga miyembro kan 20th Congress.
