LEGAZPI CITY- Matrayumpong nakua kan provincia kan Sorsogon an Guiness World Record para sa World’s largest folk dance performed sa isinagibong ”Pantomina sa Tinampo”.
Sa intrevista kan Bombo Radyo Legazpi kay Jerome Theo an organizer kan ”Pantomina sa Tinampo”, kasuodma kan pormal ng inanunsyar kan Guiness record representative an pagkakasungkit kan provincia sa nasabing record kung sain nasa 7,127 an nairehistrong folkdancers base sa validation kan adjudicator.
Napag-araman na naghaloy nin nasa 34 minutos an pagsayaw kan mga dancers sa tugtog kan Pantomina na sinabayan mismo ni Sorsogon Gov. Chiz Escudero, agom kaini na si Heart Evangelista asin iba pang mga lokal na opisyal.
Makalihis an aktibidad asin an pormal na anunsyo, nagkaigwa man nin halipot na programa bilang pag-oogma asin pagtataong pasasalamat sa gabos na mga nakisabay sa event.
Mientras tanto, ipighayag man ni Theo na obheto kan nasabing aktibidad bako sana nganing makapagrehistro nin Guiness record alagad nganing maipabisto sa bilog na kinaban an makolor asin magayon na kultura kan mga Pilipino sa pagsasayaw nin folkdance.
