LEGAZPI CITY – Nagin matuninong asin matrayumpo an durasyon kan Palarong Panlalawigan 2025 sa provincia kan Albay.
Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na maugma ini na warang nangyaring untoward incident poon sa opening ceremony hasta sa closing ceremony kan pakawat.
Nasunod man suboot an mga nakalinyadang kawat asin natapos an mga ini nin nakabugtak sa oras.
Nagpasalamat man ini sa kagurangan na nakisabayan an kagayunan kan panahon nganing maisagibo nin maray asin warang ma-octaba na mga kawat.
Mientrastanto, pigtaram kaini na mapoon na sa masunod na semana an training kan mga gold medalist para na man sa pagrepresenta kan provincia sa paparaning Palarong Bicol 2025 na gigibuhon sa maabot na Marso.
Nakalatag na man an mga schedule kan mga training kan mga delegado nganing dae man ma-apektaran an saindang pag-aadal.
Kompyansa si Tena na kakayanon kan mga ini na ganahon an mga medalya sa regional meet asin maipadagos an saindang pamamayagpag hasta makaabot sa palarong pambansa.
