LEGAZPI CITY—Gadan an sarong pahinante makalihis na maaksidente an saindang piglulunadan na dump truck sa Purok 1, Barangay Bañadero, sa banwaan kan Daraga, Albay.
Segun ki Daraga Municipal Police Station Chief of Police Police Lieutenant Colonel Edgar Azotea, sa intrevista kan Bombo Radyo Legazpi, na pasiring sa probinsya kan Sorsogon an behikulo, alagad pag-abot sa may parte kan nasabing barangay, bigla ining nawaran nin preno asin dae na nakontrol kan driver.
Bago pa man makasadsad pasiring sa gilid kan tinampo an nasabing truck, nagbalo an biktima na maglukso paluwas kan behikulo alagad napasala ini.
Dinara an biktima sa ospital alagad dae na ini naisalbar pa.
Segun ki Azotea na wara man na ibang behikulo an nadamay sa insidente.
Sa presente, yaon na sa kustodiya kan Daraga MPS an driver nganing mag-agi ini sa mga legal na proseso.
Dugang kan opisyal, na dae pa man nagsusunad nin kaso an pamilya kan nagadan huli ta pag-oolayan pa kun ano an saindang magigin desisyon.
Posibleng mahampang sa kasong Reckless Imprudence resulting to Homicide an driver.
Mientrastanto, pangapudan man ni Azotea sa mga driver na pirmeng paghilingon an kamugtakan kan saindang behikulo bago magbiyahe nganning maibitaran an mga siring na insidente.
