LEGAZPI CITY – Gadan an sarong indibidwal makalihis tuminagilid an sarong truck sa Barangay Tabiguian, Tabaco City, Albay.
Segun ki Tabaco City Police Station Public Information Officer Police Staff Sergeant Elaine Adriano sa intrevista kan Bombo Radyo Legazpi na napag-araman na haleng Milaor Camarines Sur an behikulo sakay an driver asin 33 anyos na pahinante asin pasiring kuta sa sarong quarry site kan nasambitang ciudad.
Susog man sa saindang imbestigasyon an pag-abot pasiring sa pababang parte kan tinampo an narisa kan driver na dae na nagkakagat an preno kan saindang truck.
Pigporbaran pa kutang i-overshoot kan duwa an truck alagad naisipan kan mga ini na maglukso sa nasabing behikulo nganing makaligtas sa pagbulusok kaini pababang tinampo kan naunambitang barangay.
Pigtaram pa kan opisyal na huli sa paglukso kan duwa sa nagdadalagan na behikulo an nagsapo nin tama sa hawak an driver mantang malalang tama man sa payo an pigsapo kan saiyang pahinante.
Pigporbaran pa kutang darahon an duwa sa pinakaharaning hospital kun sain nabuhay an driver asin nagpaparahay na alagad idineklarang dead on arrival an saiyang pahinante.
Sa kagayunan an warang nadamay na ibang indibidwal an behikulo na ibinangga kan driver sa sarong bakanteng lote sa naunambitang ciudad.
Mientrastanto, sasaguton kan kompanya an gastos sa pagpaparahay kan driver asin pagpapalubong sa nagadan na pahinante.
Pagirumdom man ni Adriano sa mga driver na mag-ingat asin permihang i-check an kondisyon kan saindang behikulo arug na sana kan mga preno nganing malikayan an kaparehong insidente.
