LEGAZPI CITY – Nagin matuninong alagad mauran an pagselebrar kan mga albayano sa aldaw kan kapaskuhan.
Segun ki Police Colonel Julius Añonuevo, an provincial director kan Albay Police Provincial Office sa intrevista kan Bombo Radyo Legazpi na warang naitalang christmas related incident alagad binaha an mga nagkapirang lugar sa probinsya nin huli sa mga warang patod na pag uuran kan Disyembre 24.
Nagtao man sinda nin asistensya sa mga binaha na lugar sa Albay nganing tulos na makalipat an mga ini sa mga evacuation centers.
Pigtaram pa kaini na pigtuunan nguna nin pansin kan saindang mga kapulisan an pagtabang sa mga binaha alagad dae man ninda pighali an pagbabantay sa seguridad asin pazy orden partikular na sa mga pasyaran.
Sa ibong kan mga nagin pag-uuran, pigtawan doon ni Añounevo na nakatabang suboot an mga ini nganing mamantenir an zero firecraker related incidents nin huli ta dae man nagruluwas an mga tawo sa saindang mga kaharongan.
Sa ibong kan dakulang bilang nin mga nag-atendir sa christmas eve mass, partikular na sa mga simbahan sa Legazpi City asin Daraga, warang naireport na seryosong insidente na nakaapektar sa seguridad kan mga mananampalataya.
Pagirumdom kaini sa publiko na mag-ingat an gabos asin magin rigmat nganing maiselebrar an papaabot na bagong taon nin maugma asin warang casualty sa enterong provincia.
