LEGAZPI CITY – Ikinaogma kan sarong kongresista an naging desisyon kan korte na paramientras na pagpapapundo kan ipigtalaan kutang implimentasyon kan provincial bus ban sa kalabaan kan EDSA.
Ini makalihis na ibaba kan Quezon City RTC Branch 223 an writ of preliminary injunction para sa lakdang.
Sa intrevista kan Bombo Radyo Legazpi ki Ako Bicol Partylist Rep. Alfredo ‘Pido’ Garbin Jr., tinawan nin atensyon kan korte an pangapodan huli ta meritorious an petisyon sa pagbabawal sa provincial buses na maglaog sa EDSA.
Segun digdi, maikokunsiderar na trayumpo para sa milyon-milyong mga commuters na hali sa mga provincia an pagpapaluwas kan writ of preliminary injunction kan korte.
Mientras tanto, liwat na pigduon ni Garbin na bako solusyon sa trapiko sa EDSA an pagbabawal sa mga bus na hali sa mga provincia.
Dugang pa kan kongresista na makalihis an desisyon kan korte, mas mapoprotehiran pa an direchos kan riding public na naglalaom sana sa mga pampasaherong bus bilang ‘mode of transportation’ pasiring sa Metro Manila.
Napag-araman na enot nang nagsunad an kongresista nin urgent motion sa Korte Suprema tangarig na magkaigwa nin temporary restraining order (TRO) sa preliminary injunction kan nasambitan na lakdang.
Mientras tanto, susog man sa esfuersos kan mga transport association an ibinabang desisyon kan korte kasuodma, Agosto 2.
