LEGAZPI CITY- Nagpatanid an Octa Research group sa mga namamanwaan na magin malikay sa pagpili kan mga lider na mailehir sa posisyon.
Napag-araman na sa presente nagsasagibo nin pag-aadal an grupo kun sain kaibanan sa election related question an paghahapot sa mga respondents dapit sa vote buying.
Segun ki Octa Research Fellow Dr. Guido David sa intrevista kan Bombo Radyo Legazpi na kinakaipuhan na mamantenir na malinig asin warang kadahasan sa panahon kan pirilian.
Paliwanag kaini na kun igwang nagbakal nin boto, dae ini dapat pagtugutan kan mga namamanwaan.
Nagtutubod kaya an opisyal na kun igwang nangyayaring vote buying, karibay man kaini an demokrasya kan nacion.
Dugang pa ni David na an punto kan demokrasya iyo an pagpili kan mga makakatabang sa ekonomiya.
