LEGAZPI CITY — Nagpagirumdom an Department of Health (DOH) Bicol katakod kan mga naiirehistrong kaso nin suboot food poisoning o kontaminasyon sa pagkakan ngunyan na summer season.
Sa intribista kan Bombo Radyo Legazpi ki Connie Lyn Ramirez, sanitary engineer kan DOH Bicol, nagtao ini nin mga tips kun pano masi-siertong salbado kontra sa kontaminasyon an mga pagkakan na pigbabakal o pighahanda sa mismong mga harong.
Sigon ki Ramirez, enot dapat na hugasan na marhay an mga ingredients arog kan gulay asin karne asin lutuon man ining marhay.
Imantinir suboot an temperatura kan pagkakan kun mainit ini o malipot.
Para man sa mga mabakal nin street foods, sinabi ni Ramirez na dapat na magin metikuloso sa paagi kan paghiling sa klase kan lugar na napu-pwestuhan kaini, sa proseso kan pagpreparar kan pagkakan asin pagsiertong bagong luto o mainit pa ini.
Dugang pa kan opisyal, nagigin kontaminado an pagkakan tuyong nae-expose nin apat na oras sa room temperature na labi sa 60 degree celsius.
Mientrastanto, para sa may mga planong mag-outing, payo ni Ramirez na magbalon na sana nin home-made foods ngani na maibitaran an food poisoning.
Apwera digdi, patanid kan sanitary engineer na magin malikay sa pagpreparar kan ano man na pagkakan urog pa na nakaka-trigger nin kontaminasyon an naeeksperyensyahan na matinding ini kan panahon.
