LEGAZPI CITY – Pigrerespeto kan Bicol Regional Peace and Order Council (RPOC) an suboot pagkakasabay kan 15 alkalde hale sa rehiyon sa mga kinasuhan kan Department of Interior and Local Government (DILG) sa isyu kan Anti-Drug Abuse Council (ADAC).
Sa intrevista kan Bombo Radyo Legazpi ki Legazpi City Mayor Noel Rosal, nagtitindog na RPOC chairman, haloy naman na pigpamobilize an mga ADAC kun kaya pasensyahan na sana kun nata kaipuhan na mag-justify kan mga alkaldeng nakasuhan.
Aminado man si Rosal na maikokonsiderar na “wrong timing” an nangyari urog na sa mga nagdadalagan para sa pirilian sa Mayo 2019.
Huli man ta kampanya kontra sa droga an mayor na konsentrasyon kan presenteng administrasyon, ipinagirumdom kan alkalde an pag-ipos kan mga banwaan tangarig na maresolberan an problema.
Abiso man ni Rosal sa iba pang opisyal na i-activate naman an mga ADAC na haloy nang dae naghihiro tangarig na dae makasuhan.
