LEGAZPI CITY – Nanindugan an Commission on Elections Bicol na dae man nakaapektar sa voters registration an posibilidad na mapirmahan ni Presidente Ferdinand Marcos Jr. an ley na nagkakansela kan Baranggay and Sangguniang Kabataan Elections.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na maski may ley na an may pirang election lawyer na madulok sa korte suprema nganing baliktadon an ley asin idagos ini liwat sa Disyembre.
Alagad punto niya na sa ibong kan posibleng pagkansela an kaipuhan magparehistro kan mga mawot magboto enkaso idagos an pirilian ini ngonian na taon.
Nagpasalamat man siya sa mga inisyatiba kan mga jovenes asin magurang nganing makapagrehistro na nagin lyabi man sa saindang magayon na turnout.
Pigtaram pa kan opisyal na kadaklan sa mga nagparehistro an nagmamawot na makapag-elihir ki tawong magdadara nin pagbabago sa saindang lugar asin sa nacion.
Afuersa sa voters registration an nagsasagibo na man sinda nin voters registration nganing matawan impormasyon manungod sa tamang paagi kan pagboto.
Pagsyerto niya man sa publiko na willing man sinda mag extend para sa mga nagpipila na aabutan nin cut-off sa huring aldaw kan voters registration sa August 10.
Pagdoon pa ni Valeza na siring kan sinabi ni Comelec Chairman George Garcia an wara nang extension an voters registration alagad enkasong magdesisyon an korte suprema na isibog an pirilian an pwedesir sindang magbukas liwat nin voters registration sa mga masunod na bulan.
