LEGAZPI CITY-Naglangkaw nin 6.39% an kabilugang kita kan gaming industry sa Pilipinas kan taong 2025, susog sa Philippine Amusement and Gaming Corporation (PAGCOR).
Basado sa datos, uminabot sa P396.14 bilyon an gross gaming revenues (GGR) kan 2025, mas halangkaw ini kumpara sa P372.33 billion kan 2024.
An paglangkaw kanini, huli sa paglago kan online asin electronic gaming.
Segun sa PAGCOR, an e-games asin online gaming segment, arog kan e-bingo asin iba pang digital betting platforms, naglago nin 30.44% asin uminabot na sa P201.12 bilyon.
Ini na an pinakadakulang kita kan industriya, na sakop kan 50.77% na kabilugang gross gaming revenues.
Mientras tanto, buminaba man an kita kan mga traditional o brick-and-mortar casinos nin 9.58% sa P182.50 bilyon, mantang buminagsak man an PAGCOR-operated casinos nin 20.95% sa P12.52 bilyon.
Segun kay PAGCOR Chairman asin CEO Alejandro Tengco, malinaw na nagbago na an industriya huli ta an online gaming na an pangenot na nagtutuklang sa paguswag kaini, bako sana an sarong supplementary segment.
Ipinaliwanag man niya na nagkaigwa nin temporamenteng pagbaba kan ikatulong kwarter kan 2025 huli sa mga pagbabago sa digital payment systems, nakatabang ini sa mas mahigot na regulasyon, mas ligtas na transaksyon, asin mas halangkaw na kumpiyansa sa industriya.
