LEGAZPI CITY- Pangapudan ngunyan kan kapitan kan Barangay San Francisco, Legazpi City na mapagbigyan an saindang kahagadan na magkaigwa nin sadiring evacuation holding center.
Ini an katakod kan pigkakahaditan na mga negatibong epekto kan mga raot nin panahon na posibleng tumama sa provincia kan Albay.
Segun ki Kapitan Ronaldo Aringo sa intrevista kan Bombo Radyo Legazpi na dakulang tabang an nasabing pasilidad para sa mga residente na komon na naaapektaran kan mga kalamidad.
Pigkakahadit kaya kan opisyal an enot na pronouncement kan Department of Education na dae na ipapagamit an mga classrooms sa mga evacuees.
Aminado ini na warang bastanteng pondo an barangay kaya hagad ninda na maaksyunan an nasabing propuesto.
Mientras tanto, ikinaugma man kan nasabing opisyal an nagin pronouncement ni Presidente Ferdinand Marcos Jr. na pagtataong atensyon sa mas dakol na mga irrigation facilities sa manlain lain na mga provincia sa nacion.
Sa siring na paagi matatabangan pa suboot an mga lokal na paraoma para sa pagsierto kan mas halangkaw na ani.
