LEGAZPI CITY – Pighihiling kan Federation of Free Farmers bilang huring baraha kan gobierno an ginibong pagdedeklara nin food security emergency on rice nganing mapababa an presyo kan bagas sa nacion.
Magigirumdumang ipinaotob kan nakaaging aldaw ni Department of Agriculture (DA) Secretary Francisco Tiu Laurel Jr an nasabing deklarasyon nganing mailuwas an mga rice buffer stocks kan National Food Authority (NFA) nganing maging stable an presyo kan bagas.
Segun ki Federation of Free Farmers Chairman Leonardo Montemayor sa intrevista kan Bombo Radyo Legazpi na nakikisumaro sinda sa kamawotan kan DA na mapababa an presyo kan bagas nganing magin abot kaya para sa mga nagtitios.
Alagad, dakulon na man suboot na pigbalo an gobierno na mga paagi nganing mapababa sana an bagas arug kan “sulit rice”, pagtangkas kan mga label kan mga bagas, asin an kakapapaotob pa sanang 58 pesos na maximum suggested retail price (MSRP), na hasta sa ngonian wara man giraray ki positibong nangyayari.
Sa hiling kaini, madepende sa numero kan supply kan NFA na buffer stock kun hanggang nuarin an pagpapaotob kan deklarasyon sa nacion.
Pigtaram pa ni Montemayor na mababa man an bakalan nin mga paroy sa pagultangan kan private trader asin paraooma nin huli ta pwedesir na 17 pesos per kilo sana an presyo kan paroy na pwedesir ikalugi kan mga paraooma sa nacion.
Dae pigtupad kan gobierno an orihinal na intensyon kan Executive Order 62 na dapat buminaba na nin 7 pesos an presyo kan bagas sa merkado.
Sa ibong kan paggibo nin lakdang nganing mapababa an presyo kan bagas, pangapodan kaini sa gobierno na dapat man giraray na atamanon an mga paraooma nin huli ta pwedesir na magkaproblema sa masunod na anihan enkaso malugi an mga paraooma sa hibabang presyuhan kan paroy.
