LEGAZPI CITY – Padagos an monitoring kan mga otoridad sa mga kakalsadahan sa ciudad kan Legazpi makalihis an naresibing report manungod sa mga agresibong hiro kan mga badjao pati an isyu kan illegal parking.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na kan nakaaging aldaw an may nahiling siyang mga badjao na basta na sanang naglulukso sa mga jeep mantang nag-aandar ini na nagtataong huma man bako sana sainda kundi pati na sa driver asin commuter.
Makalihis an saiyang nahiling an pinagirumduman ninda an mga driver na gibuhon an gabos nganing dae makasakay an mga badjao alagad nanindugan an mga driver na dae sinda pigsusunod kan mga ini asin nagpipirit na magtao nin sobre sa mga pasahero.
Pagkatapos suboot kan matrayumpong selebrasyon kan Ibalong Festival an pigtatrabaho naman ninda ngonian an paglinig sa mga kakalsadahan sa ciudad kasabay an Public Safety Office.
Pigtaram pa kan opisyal na nagdugang man sinda ngonain nin mga wheel clamp nganing maibitaran an pagreklamo kan ibang tawo na natatawan ninda nin ticket maski dae na-clamp an saindang behikulo.
Laoman suboot na wara sindang sasaltuhon kun kaya mas maray na magsunod na sana sinda sa ordinansa nganing maibitaran an pagka-clamp kan saindang behikulo na haros taon-taon na sanang problema sa ciudad.
Nakatalaan man sindang makipag-olay ki Mayor Hisham Ismail nganing magibuhan nin lakdang an pagdakol kan nagbabalagaw-bagaw na mga badjao na nagigin rason kun ngata abo kan mga pasahero na magsakay sa mga jeep.
Pagirumdom ni Marbella na tabangan sinda sa saindang piggigibong lakdang huli ta sinda man sana an mabebenipisyuhan kapag nalinig na ninda an mga kakalsadahan sa ciudad kan Legazpi.
