LEGAZPI CITY—Nagresulta sa pagkakaarestar kan pitong indibidwal asin pagsakyada sa sarong drug den an kinundusir na buy-bust operation kan mga otoridad sa Barangay 37-Bitano, Legazpi City, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, an mga nasabing suspek an pararehong residente kan nasabing barangay asin kadaklan digdi an kabale sa newly identified individuals.
Nakumpiskar sa mga suspek an nasa 13 gramos nin pigtutubudang shabu na may kantidad na P88,400.
Naarestar an mga ini sa pinagsarong operatiba kan Albay PPO asin Philippine Drug Enforcement Agency Regional Office 5.
Nagpapasalamat man si Nuñez sa mga namamanwaan na nagtatao sainda nin impormasyon sa mga persona na nadadawit sa paggamit nin ilegal na droga.
Mientrastanto, nasa kustodiya na kan kapulisan an mga suspek asin nahahampang sa kasong pagbalgar sa Republic Act No. 9165 o Comprehensive Dangerous Drugs Act of 2002.
