LEGAZPI CITY– Makusog an pagtubod kan Bayan Bicol na igwa nin kinaaraman an pagbawi kan New People’s Army (NPA) sa unilateral ceasefire sa mga suboot pagbalgar kan mga militar.
Sigon ki Vince Casilihan, tagapagtaram kan Bayan Bicol, nanotaran an padagos na militarisasyon asin pagbalgar sa karapatang pantawo sa ibong kan tigil-puntukan alagad dae man ipigbuyagyag sa publiko.
Kabale suboot digdi an pagpaapod kan mga soldados sa mga sibilyan asin pagpapapirma sa mga ini sa blangkong papel.
Dugang pa kaini, kun nagsunod sana an mga militar sa direktiba ni Presidente Rodrigo Duterte, dae kuta babawion kan bandidong grupo an deklarasyon.
Tinawan duon man ni Casilihan na dapat na ipadagos kan gobyerno an peace talks sa CPP-NPA-NDF sa ibong kan nasambitan na paglift kan ceasefire.
Mientrastanto, pighayag man kaini na dapat na i-revoke na kan Pilipinas an manlaen-laen na kasunduan sa Estados Unidos arog kan Enhanced Defense Cooperation Agreement (EDCA) asin dae na pagpalaugon sa nasyun an mga Amerikanong soldados huli ta lugi an satuyang nasyun.
