LEGAZPI CITY- Nagin matrayumpo an pagbabalik kan biyahe kan Philippine National Railways hali sa Legazpi City pasiring sa Naga City asin vice versa.
Segun ki Philippine National Railways General Manager Deovanni Miranda sa intrevita kan Bombo Radyo Legazpi na sa enot na aldaw kan pagbabalik kan biyahe, bako pa marhay dagsa an mga pasahero alagad matanos man na nakapagserbisyo sa publiko.
Napag-araman na nasa poco mas o menos 200 na mga pasahero an naserbisyuhan sa enot na aldaw kan pagbabalik kan biyahe.
Marurumduman kaya na nagsairarom sa repair an nagkapirang tren kan nakalihis na taon makalihis na malubog sa baha durante kan pagtama nin mga bagyo sa rehiyon kaya paramientras na napundo an biyahe.
Antes na magbalik sa biyahe, kinaipuhan muna na salidahan an electronics asin electrical parts kan nasabing mga tren.
Kumpiyansa man si Miranda na sa masunod na mga aldaw, masakat pa sa 400 hasta 500 an mga pasahero na maseserbisyuhan maski pa sarong tren pa sana an nagba-biyahe.
