Magkakaigwa nin hearing an Senate Blue Ribbon Committee ngonian na semana dapit sa pagpapaluwas liwat kan Bureau of Internal Revenue (BIR) kan letters of authority (LOA) asin mission orders (MO), kasunod kan mga alegasyon nin extortion na nagresulta sa temporamenteng suspension kan mga ini kan Nobyembre.
Segun ki Senate President Pro Tempore Panfilo “Ping” Lacson na iyo man an committee chairman, katuyuhan kan hearing na matawan linaw kun ano an mga reporma asin safeguards na pig-implementar kan BIR antes ini nagbalik sa audit operations.
Nanindugan si Lacson na dapat pormal na ipaliwanag kan BIR sa senado an mga pagbabagong ginibo nganing masierto na dae na mautro an suboot pang-aabuso sa mga nagbabayad nin buwis.
Kun mapatunayan suboot na igwa nin supisyenteng mekanismo ngani na maibitaran an pang-aabuso, pwedesir nang tapuson kan komite an pagtukar sa bagay na ini.
Kan nakaaging semana, pig-anunsyar kan BIR an pagbalik kan audit operations, kabale na an pagpaluwas kan letters of authority asin mission orders, na sinuspinde kasunod kan mga reklamo nin extortion na konektado sa tax audit process.
Basado sa mga report, sinabi ni BIR Commissioner Charlito Mendoza na kabale sa mga ipapaotob na reporma iyo an paglimitar kan pag-isyu kan letters of authority sa sarong beses sana kada taxpayer kada taxable year.
Magkakaigwa man suboot nin paagi an mga taxpayer na ma-verify an legitimacy kan letters of authority sa paagi kan chatbot kan ahensya.
Mientrastanto, piglalaoman na matatawan nin atensyon an Blue Ribbon Committee hearing sa accountability, transparency, asin proteksyon kan mga taxpayer kasabay kan pagbabalik kan poder kan BIR na magsagibo nin mga audit.
's reissuance of letters of authority (LOA) and mission orders (MO), following allegations of extortion that resulted in their temporary suspension in November.){kind=link}