LEGAZPI CITY – Imbes na uranon nin mga pagtuyaw asin kritisismo, dapat na omawon man an mga pigigibong esfuersos kan nagdedesider na mga empleyado kan Department of Social Welfare (DSWD) sa tahaw kan coronavirus disease (COVID-19) crisis.
Simbag ini ni Presidential Anti-Corruption Commission (PACC) Commissioner Manuelito Luna sa mga nagtutuyaw sa haloy suboot na responde kan mga DSWD workers na nagbabariwas nin tabang sa mga apektado.
Ipigdepensar ni Luna sa ekslusibong intrevista kan Bombo Radyo Legazpi na dawa kulang sa manpower, nagagampanan man kan mga nasabing empleyado an mandato asin responsibilidad.
Bilang dating counsel sa sarong DSWD regional office, nahiling suboot ni Luna kun papanong magtrabaho an mga empleyado kan DSWD urog na an nasa field.
Sa tahaw kan dakulang agyat huli sa nakakagadan na virus segun ki Luna, suporta an mas kaipuhan kan mga empleyadong nasa disaster response kesa pagtuyaw.
Magigirumdumang enot nang pinuna ni Deputy Speaker asin Camarines Sur 2nd district Rep. Luis Raymund “LRay” Villafuerte an DSWD huli sa pag-imponir nin dificil na mga patakaran kaya napupugulan an marikas na pag-release kan emergency subsidy sa milyon-milyong benepisyaryo.
