LEGAZPI CITY- Nagtao an Department of Education (DepEd) Bicol kan financial assistance sa pamilya kan ginadan na paratukdong si Teacher Mylene Durante sa Albay.
Ipighayag ni DepEd Bicol information officer May Jumamil sa intrevista kan Bombo Radyo Legazpi na nagpasiring an team sa harong kan paratukdo sa Polangui tangarig na personal na i-abot an P100, 000 para sa nawalat na pamilya kaini.
Sa ibong na lado, nasa DepEd central office naman si Regional Director Gilbert Sadsad tangarig personal na isumitir an comprehensive report kan nangyari asin ilatag an apelar na tawang-duon an “security agreement” kan ahensya sa pulisya asin lokal na pamahalaan para sa mga nagtutukdo sa liblib na lugar.
Dugang pa ni Jumamil na nag-abiso na man an director sa mga school’s division superintendent sa rehiyon na magsagibo nin inventory sa mga paratukdong naka-assign sa hararayong lugar tangarig mai-coordinate sa LGU.
Napag-araman na naresibe na kan Police Regional Office 5 (PRO5) an surat kan DepEd na pighahagad kan dugang na security detail para sa duwang estudyante na magsisirbing witness sa kaso kan ginadan na paratukdo, siring man sa pagbabantay sa mga eskwelahan sa distant areas
