LEGAZPI CITY—Personal na nagpasiring sa Office of the Senators sa Pasay City kan Pebrero 4, an mga opisyales kan Barangay Masarawag, Guinobatan, Albay nganing magsumiter nin resolution mapadapit paghagad nin pondo para sa flood mitigaton sa saindang lugar.
Ini makalihis an mga pagbabaha na saindang naeeksperyensyahan sa haloy nang panahon urog na tuyong may pag-uuran sa barangay.
Segun ki Brgy. Kagawad Don Carullo kan nasabing barangay sa intrevista kan Bombo Radyo Legazpi, sa presente wara pa man sindang naresibeng kasimbagan alagad naglalaom sinda na igwang positibong simbag gikan sa Office of the Senators.
Afuera didgi nagtao na man nin statement si Albay Governor Noel Rosal na saro an saindang barangay sa prayoridad kan Department of Public Works and Highways.
Pighayag kan opisyal na an problema sa saindang barangay an kawaran nin flood way o water way kun kaya diretso an tubig tuyong may pagbabaha sa mga tinampo na bako suboot normal.
Paliwanag pa niya na mantang warang pag-uuran sa mga hibabang lugar alagad naghahale an uran sa itaas na parte kan barangay kun sain igwang coconut farmland na may 400 ektarya-600 ektarya.
Segun saiya na an saindang lugar an dating kagubatan asin ginibong coconut farmland kaya ngunyan compacted an kadagaan asin dae naghuhupa an tubig huli sa wara nang first line of defense na nagreresulta sa pagdiretso kan tubig sa saindang barangay.
Pangapudan man ni Carullo sa Department of Environment and Natural Resources (DENR) na magkaigwa nin reforestation project huli sa kawaran nindang first line of defense sa lugar.
Mantang igwa man sindang piggibong flood mitigation project alagad dae man ini pigkakaya urog na pag nagdadakula an baha asin dae kaya kan pondo kan saindang barangay.
Naglalaom man an saindang opisina na magkaigwa nin positibong simbag an provincial government asin national government na maresolbaran an saindang haloy nang pig-aagrangay na problema.
