LEGAZPI CITY—Pignigaran kan mga opisyales kan Barangay Mi-isi, Daraga, Albay na imbuelto an saindang barangay sa pangingikil suboot sa quarry operations sa nasabing barangay.
Magigiromdomang sarong dating konsehal kan banwaan nin Tiwi, Albay an naarestar kan mga otoridad sa laog kan sarong pribadong quarry sa nasambitang barangay huli sa suboot pangingikil sa sarong quarry operator.
Segun ki Barangay Mi-isi, Daraga Kagawad Servando Loria, sa intrevista kan Bombo Radyo Legazpi, na wara suboot nin kinaaraman an saindang barangay sa isyu asin an solamenteng papel sana ninda an pag-check kan mga permiso sa kun tama an pag-operate pag-abot sa quarry operations.
Sa presente, walong quarry operations an may permiso sa lugar asin wara man suboot na nangingikil sa saindang barangay nganing ipagpadagos an operasyon.
Nakigkig suboot an saindang opisina sa bareta mapadapit sa pagkakaarestar kan sarong lalaki na nangikil suboot sa sarong quarry operator sa saindang lugar.
Dugang kan opisyal na wara man sindang naresibe na ano man na report na igwang nangikil bago pa man an nangyaring pagkakaarestar sa nasambitang indibidwal.
Mantang dae ninda pigtatangkas an posibilidad na gamiton suboot an pangaran kan saindang barangay sa pangingikil nin kwarta nganing ipagpadagos an quarry operations, alagad, tinawan-duon ni Loria na wara man sindang pigsabi na magbayad nganing maipagpadagos an quarry operations sa Barangay Mi-isi.
Abiso kan opisyal sa mga quarry operators na mag-report sa barangay council en kaso makaeksperyensya nin pangingikil nganing tulos ninda ining maaksyunan.
