Ipighayag kan bagong talagang Ombudsman na si Jesus Crispin ‘Boying’ Remulla na saiyang gigibohong bukas sa publiko an Statement of Assets, Liabilities, and Net Worth o SALN kan mga opisyal kan gobierno.
Sa saiyang enot na aldaw na pagtukaw bilang ika-pitong Ombudsman, inanunsyar kaini na magibo nin panibagong polisiya nganing magkaigwa nin ‘access’ an namamanwaan sa nasabing dokumento.
Segun saiya na sa masunod na semana an plano tulos kaini na magluwas nin memorandum nganing bilogon an mga panuntunan para sa paghagad na makakua nin kopya kan dokumento.
Mientrastanto, ipigheras man ni Ombudsman Boying Remulla na balak nindang balikan an isyu mapadapit sa Pharmally scandal.
Saiyang ipigheras na liwat na hihilingon asin bibisitahon an nasabing kaso sa nakaaging pandemya sa nacion.
Segun ki Ombudsman Remulla, tatawan atensyon an mapadapit digdi huli sa suboot nalingawan na an isyu kan Pharmally.
Nagtutubod man siya na dae dapat ini paglingawan asin nararapat sanang liwat ining balikan nganing tawan nin linaw asin maaraman an bilog na katotoohan.
Magigiromdomang sa nangyaring hearing kaito kan Senate Blue Ribbon Committee an diniskotir an nasabing isyu katakod sa bilyong pondo na ipigbakal kan Department of Health para sa mga overpriced na medical supplies sa kasagsagan kan pandemya.
Dugang pa digdi, aminado si Ombudsman Remulla na dae niya ka-kabisado an nasabing isyu huli sa dae niya suboot ini natutukan na maray.
Alagad saiyang sienerto na warang sasantuhon ano man na posisyon an madiskubre an may paninimbagan sa kontrobersiya.
Basehan niya suboot digdi an ebidensyang makapagsasabi o makapagpapatunay sa pagkakadawit kan opisyal.
