LEGAZPI CITY-Pigsugo kan Office of the Ombudsman si Senador Francis Escudero na mag-file kan saiyang counter-affidavit manungod sa mga alegasyon nin pagkaimbwelto sa suboot flood control scandal.
Segun kay Assistant Ombudsman Mico Clavano, nasa preliminary investigation stage na an reklamo kontra sa senador, kun kaya pighahalat an saiyang simbag ngani na maipadagos an imbestigasyon.
Kabale sa reklamo na pigkakahampang ni Escudero an mga alegasyong plunder, graft, asin bribery na igwang koneksyon sa mga suboot insertions sa national budget sa flood control projects.
Segun sa mga pahayag na naglutang sa imbestigasyon, naimbuelto suboot si Escudero makalihis na sabihon suboot ni dating undersecretary kan DPWH na si Roberto Bernardo na igwang mga proyektong kabali sa General Appropriations Act kapalit kan komisyon o “cut.”
Nagluluwas man sa mga alegasyon na nagkakantidad nin bilyong-bilyong piso an mga proyektong pigpreparar suboot sa nagkapirang lugar, asin igwa suboot na cash deliveries na imbuelto sa bagay na ini.
Mientrastanto, pinahimutikan man ni Escudero an anuman na pagkaka-imbwelto sa mga anomalya.
Kasabay kaini, sinabi man kan Ombudsman na nasa irarom man kan preliminary investigation sa suway na kaso laban ki dating House Speaker asin Leyte Rep. Martin Romualdez.
Segun ki Ombudsman Jesus Crispin Remulla, pigrerepaso na kan saindang opisina an 2024 asin 2025 national budget, asin posibleng makaabot pa ini sa mga nakaaging administrasyon basado sa testimonya na nakua sa mga hearing kan Senado.
Sinabi man kan Ombudsman na parte kan mga ebidensya an mga pahayag na nagluwas sa mga hearing kan Senate Blue Ribbon Committee na igwang kinaaraman sa kontrobersiya.
