Lagpas na sa 100 katao an nairehistrong mga nagadan mantang may pira pa mang padagos na nawawara sa panrarapado kan mga pagbaha sa Texas, USA.
Sa Camp Mystic, na sarong Christian girls’ summer camp sa Kerr County, harani sana sa uminapaw na Guadalupe River, 27 mga aki asin sarong counselor an kumpirmadong nagadan mantang 10 pang campers asin sarong counselor an mantinidong nawawara.
Hale sa 84 na biktima, 56 digdi an adults asin 28 an mga aki na nagadan sa Kerr County kun saen uminapaw an Guadalupe River kawsa kan makukusog na pag-uran bago mag-aga kan Biyernes, Hulyo 4.
Nasa 22 adults asin 10 aki an dae pa naaaraman an identidad segun sa sheriff office kan nasabing county.
Segun kay Texas Gov. Greg Abbott, padagos an paghahanap kan rescuers sa dose-dosenang nawawarang katawo sa mga sinalantang lugar.
Katakod kaini, nagtabang na man sa pagresponde sa mga pagbaha sa estado an labi 20 state agencies.
Piglalaoman man na mahupa na an maraot na kamugtakan kan panahon sa Texas asin piglalaoman man an mas mainit na aldaw kumpara sa mga nakalihis na aldaw.
Mientrastanto, buminuhos man an pakikidumamay hale sa manlain-laing parte kan kinaban para sa mga pamilyang nawaran nin mahal sa buhay huli sa nasabing sakuna.
Kabale na digdi si King Charles III na suminurat kay US President Donald Trump nganing magpaabot nin labing kamunduan sa trahediya asin nag-alay nin taus-pusong pakikidumamay sa mga nawaran nin mahal sa buhay.
