LEGAZPI CITY-Naarestar an sarong No. 6 sa listahan kan mga Municipal most wanted person sa Guinobatan Albay, huli sa kasong homicide o an pagprobar na manggadan na dai pigsasadya o pigpaplano.
Segun kay Police Chief Master Sergeant Jardine Nuyda, Public Information Officer kan Guinobatan Municipal Police Station, sa intrevista kan Bombo Radyo Legazpi, naarestar an suspek na pigbistong si Salvador Monilla, sarong construction worker asin residente kan Purok 2 Barangay Morera sa Guinobatan Albay.
Ipinaluwas suboot an warrant of arrest kan suspek kan Regional Trial Court (RTC) Branch 1 kan Legazpi City poon pa kan Hulyo 18 taon 2024.
An suspek nahahampang sa kasong homicide o an pagprobar na maggadan na dai pigsasadya asin igwang piyansang nasa P120,000.
Nasa kustodiya na kan Guinobatan prison facility an nasambitang suspek.
Dagdag pa ni Nuyda, na bako madalas na igwang siring kaini na mga kaso sa saindang lugar alagad nagkapira sa mga insidente nagpopoon suboot sa irinuman asin mga tambay.
Mensahe pa kan opisyal sa mga residente na gabos na krimen igwang kinahahampang na penalidad asin mga kaso.
