LEGAZPI CITY- Pigsasapinal na ngunyan an request kan lokal na gobierno kan Pilar, Sorsogon na magkaigwa nin pabahay program para sa ginatos na pamilyang naapektaran nin kasulo sa nasabing banwaan.
Segun ki National Housing Authority Bicol Regional Manager Engineer Rolando Ramos sa intrevista kan Bombo Radyo Legazpi na an ahensya an igwang Housing assistance program for camality victims kun sain pwedesir na makapagpatindog nin nasa 700 hasta 850 na mga housing units.
Afuera digdi, igwa man na cash assistance sa calamity victims an pwedesir na maipanao sa mga biktima.
Paliwanag kan opisyal na dakulang tabang man kun igwa ng abilableng lote an lokal na gobierno ngani na mas mapadali an konstruksyon kan mga harong.
Alagad aminado si Ramos na sa presente hahanapan pa nin pondo an pabahay para sa mga biktima nin kasulo sa banwaan kan Pilar alagad kumpiyansa man sinda na matatawan ini nin alokasyon urog pang urgent an pangangaipo sa nasabing mga harong.
Oras na mapondohan na an proyekto, sinabi kan opisyal na posibleng maisakatuparan an pabahay sa laog nin anom na bulan.
