LEGAZPI CITY- Nangapudan an National Food Authority Bicol sa mga lokal na gobierno na makipagtabangan sa pagpapabakal nin baratong bakas.
Ini an kasunod kan deklarasyon kan Department of Agriculture nin food security emergency on rice.
Segun ki National Food Authority Bicol Acting Regional Manager Julie Llenaresas sa intrevista kan Bombo Radyo Legazpi na basado sa paglilibot kan ahensya, igwa nang mga lokal na gobierno an nagpahayag nin suporta para sa partisipasyon sa nasabing kasuguan.
Marurumduman na sa nasabing deklarasyon, ipapaluwas an rice buffer stocks kan ahensya ngani na magkaigwa nin stable asin mas hibabang presyo kan bagas sa merkado.
Sinabi kan opisyal na magpapaluwas sinda nin suplay nin bagas sa mga nagkumpirmar na lokal na gobierno.
Sa presente huli ta kadaklan sa mga stocks nin bagas kan ahensya an well milled, nasa P38 suboot an magigin presyuhan kaini.
Sinierto man ni Llenaresas na igwang bastanteng suplay an National Food Authority Bicol ngani na makatabang na mapababa an presyo kan bagas sa merkado asin maaprobitsaran kan mga namamanwaan.
