Inanunsyar ni Presidente Ferdinand Marcos Jr. na itinaas na sa Strategic Partnership an kooperasyon kan Pilipinas asin Canada kasunod kan pakikipag olay ki Canadian Prime Minister Mark Carney sa British Columbia.
Nadiskutir kan duwang lider an padagos na pag-uswag kan bilateral relations asin mga lakdang ngani na mamantenir an pusog kan kooperasyon kan duwang nacion.
Napagkasunduan man ninda Presidente Marcos asin Prime Minister Mark Carney na parikason an negosasyon para sa Canada–Philippines Free Trade Agreement asin pakusugon an kooperasyon sa clean energy, disaster resilience, asin food security.
Pigsugo man kan duwang lider an saindang mga foreign minister na magbilog nin plan of action ngani na ibusol an mga napagkasunduan na lakdang sa paghampang sa nagbabagong pangkinaban na sitwasyon, asin pagpapakusog kan future-ready partnership.
Tinawan duon man ni Presidente Marcos na importanteng pundasyon kan nagkukusog na relasyon kan Pilipinas asin Canada an kooperasyon sa lado kan depensa asin seguridad.
Sa isyung pangseguridad, liwat na tinawan duon kan duwang nacion an saindang suporta sa sarong malaya asin bukas na Indo-Pacific, pagrespeto sa international law, asin sa 2016 arbitral ruling sa West Philippine Sea.
Pinirmahan man kan duwang nacion an mga kasunduan sa turismo, kultura, labor asin migration ngani na mas mapakusog pa an labi sa sarong isang milyong Filipino-Canadian.
