LEGAZPI CITY—Kinumpirmar kan Coast Guard Station Legazpi na an nadukayang lalaki na wara nang buhay sa Barangay Dapdap, Rapu-Rapu, Albay, an nawawarang parasisira na gikan sa Barangay Banquerohan, Legazpi City.
Segun ki Coast Guard Sub-Station Legazpi Commander Lieutenant Junior Grade Reynaldo Aringo Jr., sa intrevista kan Bombo Radyo Legazpi, an nasabing persona an naglawod kan Agosto 10, alagad dae ini nakabalik sa nakatalaang oras kan saiyang pagbalik.
Nagkundusir an saindang opisina nin search and rescue operation kaiba an Bureau of Fire Protection, City Disaster Risk Reduction and Management Legazpi, asin Integrated Coastal Resource Management Unit Legazpi.
Nakaresibe sinda nin impormasyon kasoodmang aga, Agosto 13, na may nahiling na bangka sa Barangay Cawit, Manito, Albay kun sain kinumpirmar kan misis kan biktima na ini an pagrugaring kan saiyang agom.
Dugang niya na nakaresibe man nin impormasyon sinda gikan sa Batan Island, Rapu-rapu na may nadukayang lawas sa lugar. Kinumpirmar kan misis kan nasabing persona na ini an saiyang agom makalihis na ipahiling an ladawan kan lawas kaini.
Basado sa agom kan biktima na solong nagpalawod an saiyang agom kan Agosto 10.
Segun sa opisyal huli man suboot kan habagat kaya dae piglalaomang magkaigwa nin “subasko”.
Mientrastanto, nangapudan man an opisyal sa publiko na dae na ipagpirit na maglawod en kaso makusog an hukol , siring man na kun makaeksperyensya nin makusog na hukol pwedesir na magbalik o magpasiring sa pinakaharaning isla para man sa saindang kaligtasan.
