LEGAZPI CITY – Nahahandal an National Nutrition Council kung ano an nutrisyon na makukua kan mga Pilipino sa P64 sanang budget sa pagkaon sa kada aldaw.
Kasunod ini kan naging anunsyo kan National Economic and Development Authority na P64 an kaipohan kan kada Pilipino ngani na maikonsidera na dae na nagtitios sa pagkaon o bako ng “food poor.”
Sa intrevista kan Bombo Radyo Legazpi kay Arlene Reario an Regional Director kan National Nutrition Council, kung susunodon an abiso na ini kan ahensya malabo ng magkaigwa pa nin bastanteng nutrisyon an mga Pilipino.
Sa budget na P21 sana sa kada meals, haros kabangang takad na sana nin maluto asin sarong bonay an pwedeng mabakal kan mga Pilipino.
Wara na nin pambakal pa nin gulay o prutas na mas kaipohan para sa mabaskog na hawak.
Huli digdi, sinabi ni Reario na harayo sa katotoohan an nasabing datos kan National Economic and Development Authority na dapat na mabago asin mapag-adalan pang maray.
Abiso kan opisyal sa mga Pilipino na sa ibong kan labing pagtios, dae dapat na ipagwarang bahala an nutrisyon kan pagkaon lalo na kung para sa mga joven.
