LEGAZPI CITY – Desidido an Israeli government na pulbuson na an mga militanteng Hamas kan Palestine sa nagpapadagos na missile asin rocket attacks kan maginibong na kampo.
Sa intrevista kan Bombo Radyo Legazpi ki Malou Marigondon, OFW sa Tel Aviv, nagtao nin public address si Israel Prime Minister Benjamin Netanyahu na dai ipupundo an airstrikes hasta sa maibalik an katoninongan asin seguridad para sa mga sibilyan.
Wara man piglalaoman na ceasefire sa presente huli ta pig-iisip sana an proteksyon kan mga namamanwaan.
Huli digdi, mas nagdificil an sitwasyon kan nagkapirang Pilipino na nasa lugar.
Dai kaya makaluwas nin basta-basta kaya kadaklan an nagkakaturog na sana sa bomb shelter, nagtatrabaho nin 24/7 asin warang day-off mientras na padificilan pati pagpapadara nin kwarta sa mga naglalaom na parientes sa Pilipinas.
Maikokonsiderar pa man suboot na salbado an sitwasyon ninda sa Tel Aviv alagad mas delikado para sa mga nakaistar sa northern asin southern part kan Israel na sentro ngunyan kan mga pag-atake asin destroso.
