LEGAZPI CITY- Nagpahayag nin pagkahandal an grupong Pork Producers Federation of the Philippines sa nagbababang interes kan mga Filipino sa agrikultura na posibleng magresulta sa pagbagsak kan produksyon sa mga masunod na taon.
Sa intrevista kan Bombo Radyo Legazpi kay Nicanor Briones an vice president for Pork Producers of Luzon, narisa an pagdiit kan mga Filipino na nagkakainteres na magtanom o mag-ataman nin mga hayop huli sa nakukuang hibabang delihensya asin estado sa buhay.
Segun kay Briones bakong siring sa ibang mga nasyun an mga paraoma sa Pilipinas an pigkakapos lugod sa buhay na kawsa kan kakulangan nin suporta hali sa gobyerno.
Pigtaong ehemplo kaini an mga paraoma sa Vietnam asin Myanmar na dae namomroblema para sa saindang kapital asin pagdadarahan kan produkto huli ta nagtatao an saindang gobyerno nin subsidiya asin mismong gobyerno naman an nagbabakal kan mga produkto.
Pangapudan ni Briones na siring man kaini an gibohon sa Pilipinas, suportaran an mga lokal na paraoma asin bakong an mga mayayamang negosyante.
Makakatabang suboot kung may mareresibing subsidiya an mga paraoma, may maray na mga ekipahes, establishimento asin merkado na mapagdadarahan kan mga produkto.
