LEGAZPI CITY—Gadan an sarong 23-anyos na lalaking motorista makalihis na maaksidente ini sa hampang kan Legazpi City Hall sa Old Albay District.
Segun ki Legazpi CPS PIO PEMS Carlos Paña, sa intrevista kan Bombo Radyo Legazpi, an 23-anyos na lalaki may kairibang duwang lunad sa saiyang motor asin gabos warang sulog nin helmet.
Napag-araman man na posibleng nasa impluwensya nin bugsok na likido an mga ini.
Basado sa salaysay, nag-counterflow an biktima sa may hampang kan City Hall alagad nakasabatan kaini an sarong SUV na gikan sa Pinaric area asin posibleng madiretso sa Legazpi.
Magigiromdoman na one-way an tinampo sa parte kan Legazpi City Hall.
Huli digdi, nagadan an 23-anyos na driver, mantang an duwa kaining lunad an presenteng pigbubulong pa sa Bicol Regional Hospital and Medical Center.
Dugang pa kan opisyal na warang naipresentar na driver’s license o OR/CR an lado kan naaksidenteng motorsiklo.
Mientrastanto, sinabi man PEMS Paña, na an lado kan SUV boluntaryong matao kan pwedesir nindang maitabang sa biktima.
