LEGAZPI CITY-Nakakuleta nin kabilugang 51.2 na tonelada kan basura an Metropolitan Manila Development Authority (MMDA) kasunod kan pananalasa kan Super Typhoon Uwan.
Ini an katumbas kan 22 na truck kan basura na nagpoon sa manlain-lain na parte kan Metro Manila.
Kadakol sa mga nakulektang basura an hale sa mga estero, salog, asin sapa na inanod kan tubig-baha, mantang an iba pa an nakuwa sa mga baybayon na dara kan makukusog na alon.
Segun sa MMDA, nagpapadagos man giraraya an pangungulekta sa mga basura asin sa mahiwasang clearing operations sa mga agihan kan tubig orog na sa ngonian na nasa maayos na kondisyon na an panahon.
Nagpagirumdum man an ahensya sa importansya kan tamang waste management ngani mapugulan an matinding pagbabaha.
