LEGAZPI CITY — Hagad kan Mines and Geosciences Bureau (MGB) an klaradong polisiya ni Presidente Rodrigo Duterte katakod kan ipighayag na “open-pit mining ban”.
Katakod ini kan liwat na pahayag kan presidente sa huma kan pagpapasarado sa mga open-pit mining sa nacion na pigsasabing nakakadestroso sa kapalibutan.
Sa intrevista kan Bombo Radyo Legazpi ki MGB Bicol Director Danny Molina, sarong klase sana nin “surface mining” an open pit mining mientras na dae pang kalinawan kun magin an mga non-metallic minerals an kasabay digdi.
Kaibanan kaya sa mga pighihiling na magigin resulta en kaso ma-implementar an lakdang, iyo an kawaran nin dakol na trabaho huli sa totalmenteng pagbawal sa open-pit mining, pagbawas sa dakol na kontribusyon sa gross domestic product (GDP) siring man pag-angkat na sana kan nagkapirang mineral hale sa ibang nacion.
Napag-araman man na kasabay sa top regions an Bicol sa metalic mineral production katakod kan Masbate Gold Project.
Sa ibong kaini, preparado man an ahensya na mag-otob sa ano mang pinal na direktiba na ibababa hale sa Office of the President mientras na reresolberan man an problema sa nagkapirang minahan na nag-ooperar dawa warang inisyung permit hale sa lokal na gobierno.
