LEGAZPI CITY – Pinahimutikan kan nagkapirang mga residentes sa banwaan kan Guinobatan, Albay an suboot na nangyaring engkwentro sa pagultangan kan mga rebeldeng New People’s Army asin militar.
Sa pakikipag-olay kan Bombo Radyo Legazpi sa nagkapirang residentes, pigduon kan mga ini na an mga suldados man sana an warang habas na nagpapaputok nin badil.
Sa testimonya kan mga residentes na nakahiling kan nangyari, pigbuyagyag kan mga ini na pirit sindang pigpapatuga kan mga suldados na miyembro sinda kan komunistang grupo.
Pig-aabuso suboot kan mga suldados an saidang poder kaya labi an pagkahandal ngunyan kan mga residentes sa banwaan asin an iba an dae na man nakakabalik sa saindang mga harong.
Nahahandal na man suboot an mga ini sa kun ano an pwedesir na gibuhon sa sainda kan pwersa kan gobyerno na dapat kuta na nangangataman asin nagpo-protehir sa mga namamanwa.
Igwa na man suboot na nangyayaring harabasan asin panunulo nin mga harong kun sain an mga suldados man an pigturo na responsable sa mga nasambitan na insidente.
Marurumduman na pighayag kan 83rd Infantry Batallion na igwang duwang magkasunod na engkwentro na nangyari sa Barangay Bololo, Guinobatan, Albay.
