LEGAPI CITY- Nahahandal na an mga Filipino sa Israel sa mga pang-aatake kan Palestine na sunod-sunod an pagpapalayog nin mga rocket missiles na nagresulta sa pagkagadan kan nasa 28 katawo.
Sa intrevista kan Bombo Radyo Legazpi kay Steve Serquiña sarong OFW sa Jerusalem, Israel, base sa anunsyo kan mga otoridad nag-abot na sa 660 mga rocket missiles an pinalayog kan teroristang Hamas hali sa Gaza na nagtama sa nagkapirang mga residentes.
Mahigot an abiso kan mga otoridad sa nasa 160,000 mga pamilyang nakaistar harani sa border na magtinir muna sa saindang mga bomb shelters huli ta pinaglalaoman na magpapadagos pa an pagpapalayog nin rocket missiles kan Palestine.
Nagpuon an kariribokan kasuodma kan maglunsar nin pang-aatake an Hamas durante kan selebrasyon kan Jerusalem day rason nganing makanselar an mga aktibidad may kinaaraman sa okasyon.
Segun kay Serquiña, antes na magpalayog nin missiles nagpapaluwas man nin abiso an Hamas kung nuarin asin sain maatake kung kaya naipu-pwesto man kan militar kan Israel an saindang iron dome na nag-iintercept sa rocket.
Aminado man an OFW na dakol ng mga Pinoy sa Israel an nahahandal na madamay sa sitwasyon asin pinagpaplanohan ng magbalik muna sa Pilipinas en kasong maglala pa an sitwasyon.
Sa ngunyan naghahanda an pwersa kan Israel kan dugang pang mga armas panggera huli ta pinaglaloman na malunsar pa nin pang-aatake an Palestine sa mga masunod na aldaw.
