LEGAZPI CITY – Nagpatanid an toxic watchdog group na Ban Toxic sa publiko mapadapit mga kemikal na pwedeng makuwa kan mga ini sa pagbakal nin pangregalo sa pagselebrar kan aldaw nin mga puso.
Komon kaya sa mga pilipino na pigtatawan nin importansya an pagseselebrar kaini kada ika-katorseng aldaw kan Pebrero.
Segun ki BAN Toxics Campaigner Thony Dizon sa intrevista kan Bombo Radyo Legazpi na labing nakakahandal na kadaklan sa mga pigtatao pag-valentines day an puro mga gibo sa plastic arug kan mga burak.
Mas maray na sana suboot na natural na burak an itao sa saindang mga padaba nin huli ta pwedesir na “toxic love” an makuwa imbis na “true love” kun mga plastic na burak an mareresibi kan saindang mga namomotan.
Mapagal man sa lado kan mga konsumidores na mahiling kun may maraot na kemikal na kasabay an mga gift items nin huli ta nakapatos asin nakapakete na an iba sa mga ini.
Suhestyon kaini na magin visible an mga label kan mga nakapatos na mga gift items nganing madaling mahiling asin mabasa kan mga nagbabakal.
Magin maingat na sana suboot sa pagbakal nin mga valentine gift items nganing maprotehiran an salud laban sa mga nakakaraot na kemikal.
Pwede man iselebrar an valentines day sa pagpapahiling kan saindang pagpapadaba siring man an pagigin maray na ihemplo sa gabos.
Pagdoon pa ni Dizon na kun makaon man sa luwas o sa mga ecopark, mas maray na sana suboot na magdara nin mga washable na mga kagamitan nganing bako sana an pagkamoot ninda sa saindang namomotan an napapahiling kundi pati na man an pagkamoot kay inang kalikasan.
