LEGAZPI CITY-Nagluwas an mga bagong kakaibang pangaran na nakaagid sa mga hayop na suboot nakaresibe nin confidential funds hale sa Office of the Vice President (OVP) sa ika-17 aldaw kan impeachment trial kontra kay Vice President Sara Duterte.
Sa direct examination kan prosecution counsel na si Atty. Amando Ligutan, enot niyang hinapot an hostile witness na si Gina Acosta kun personal niyang nahiling an dating security chief ni Duterte na si Col. Raymund Dante Lachica na nagtatao nin tig-P100,000 hale sa confidential funds sa mga resipyente na si “Antonio Pagong”, “Timon Andrew Pusa,” asin iba pa.
Ipinahiling man kan piskalya an mga resibo nin pag-ako kan sarong nagngangaran na “Don Piang” na nakaresibe nin P250,000 asin si “May Pamana” naman na nakaresibe nin P150,000.
Nakalista man sa sarong resibo an pangaran na “Shane Ngitngit” na siboot nakaresibe nin P150,000 hale ki Colonel Lachica.
Sinabi ni Ligutan na an tataramon na “ngitngit” sa Bisaya nangangahulugan na “madiklom.” Ikinonek niya ini sa sarong naenot nang pinaluwas na resibo na may kaduda-dudang pangaran na “Andy Lim.”
An saro pang pangaran na si Xuniso P. Belat, nakaresibe suboot nin P100,000.
Kan hinapot an testigo manungod sa mga transaksyon na ini, consistent ining nagsabi na dai niya nahiling si Col. Lachica na nagtatao sa mga recipient asin nagsarig sana siya sa mga dokumentong isinumiter ni Lachica huli ta siya an nag-implementar kan confidential funds.
