LEGAZPI CITY- Nagkasararo an mga kapadean kan Diocese of Legazpi sa pangapodan sa gobienro na punduhon na an garadanan na nangyayari sa nacion katakod kan kampanya kontra sa iligal na droga.
Kaibanan sa mga naghampang para idiskutir an laog kan pastoral letter sinda Bishop Joel Baylon, Fr. Eric Martillano, Fr. Crispin Bernarte, Fr. Rex Arjona asin Fr. Paulo Barandon.
Tinuyaw ni Bishop Baylon an pagsimbag sa problema sa mga adik kasabay kan pagtataong-duon na bako krimen an addiction kundi sarong helang na sikolohikal kun saen nangangaipo nin direktang pagtabang.
Sinimbag man ni Fr. Arjona an mga nagpapahayag nin disgusto sa paninidogan kan simbahan sa nasabing isyu urog na sa social media.
Pag-eksplikar kan padi, pigsusurog sana kan simbahan an mga biktima nin krimen urog na an mga babaye asin kaakian magin an iba pang naaapi kun saen bako sana dapat ngani simbahan an nagigibo kaini kundi an bilog na komunidad.
Sinegundahan man ni Fr. Bernarte an pahayag kan obispo kun saen ipighayag na kaipuhan na tipunon an mga concerned na tawo sa nasabing bagay tangarig na makapagdara nin tabang sa mga nangangaipo sa paagi kan mga inisyatiba asin karahayan nin boot.
